ਆਜਾ ਮੇਰੇ ਦੇਸ਼ ਦੀ ਨੁਹਾਰ ਵੇਖ ਲੈ
ਰਾਜਧਾਨੀ ਵਿੱਚ ਬਲਾਤਕਾਰ ਵੇਖ ਲੈ
ਗੋਦੀ ਚੁੱਕ ਪਿਆਉਂਦੀ ਫਿਰੇ ਨਿੱਪਲ ਦੇ ਨਾਲ
ਗੁੰਡਿਆਂ ਨੂੰ ਦੁੱਧ ਸਰਕਾਰ ਵੇਖ ਲੈ
ਅਪਣੀਆਂ ਤ੍ਰੀਮਤਾਂ ਦੇ ਪੱਟਾਂ ਦੀ ਗੋਲਾਈ
ਲੋਕਾਂ ਨੂੰ ਵਿਖਾਉਂਦੇ ਕਲਾਕਾਰ ਵੇਖ ਲੈ
ਰਾਣਾ ਗੁਰਜੀਤ ਤੇ ਮਜੀਠੀਆ ਕੀ ਭਿੜੇ
ਅੰਨ੍ਹਾ-ਬੋਲ਼ਾ ਹੋਇਆ ਅਟਵਾਲ ਵੇਖ ਲੈ
ਚੁੰਨੀਆਂ ਨੂੰ ਕਹਿਣ ਤੁਸਾਂ ਸਿਰਾਂ ਤੇ ਹੀ ਰਹਿਣਾ
ਖੁਦ ਪੈਰੀਂ ਰੋਲ ਦੇਣ ਦਸਤਾਰ ਵੇਖ ਲੈ
ਧਿਆਨ ਪਾਸੇ ਲਾਉਣਾ ਜਾਂ ਫੇ ਬੇਹੋਸ਼ ਨੀਮ ਹੋਣਾ
ਚੈਨਲਾਂ ਦੇ ਉੱਤੇ ਲੜੀਵਾਰ ਵੇਖ ਲੈ
ਦਿੱਲੀ ਨੂੰ ਕੀ ਦੋਸ਼ ਦਿੰਦੇ ਓ ਪੰਜਾਬ ਵਾਲਿਓ
ਏਥੇ ਕਿਹੜਾ ਘੱਟ ਮਾਰੋਮਾਰ ਵੇਖ ਲੈ
ਧਰਮ ਦੇ ਨਾਂ ਤੇ ਲੁੱਟ ਹੋਣ ਲੱਗੇ ਲੋਕ ਜਦੋਂ
ਹੁੰਦੀ ਮਨੁੱਖਤਾ ਉਦੋਂ ਤੋਂ ਤਾਰ-ਤਾਰ ਵੇਖ ਲੈ
'ਗੱਗ-ਬਾਣੀ' ਨੂੰ ਤਾਂ ਐਵੇਂ ਭੰਡਦੇ ਨੇ ਲੋਕ
ਭਾਵੇਂ ਸ਼ੀਸ਼ਾ ਵੇਖਲੈ ਤੇ ਭਾਵੇਂ ਸਾਰ ਵੇਖ ਲੈ
ਆਜਾ ਮੇਰੇ ਪਿੰਡ ਦੀ ਨੁਹਾਰ ਵੇਖ ਲੈ
ਆਜਾ ਮੇਰੇ ਦੇਸ਼ ਦੀ ਨੁਹਾਰ ਵੇਖ ਲੈ...।
No comments:
Post a Comment