ਇੱਕ ਕੁੜੀ, ਜੀਹਦਾ ਨਾਂ ਮੁਹੱਬਤ
ਨਾ ਗੁੰਮ ਹੈ ਨਾ ਭਾਲ ਹੈ..........
ਨਿਰਲੇਪ ਰਹਿ, ਦੁਹਾਈਆਂ ਪਾਉਣਾ
ਇਹੋ ਸਮੇਂ ਦੀ ਚਾਲ ਹੈ...........।
ਮਾਰੂਥਲ ਵਿੱਚ ਭਟਕਦੀ
ਹੋਠਾਂ ਤੇ ਪਿਆਸ ਲੈਕੇ,
ਖੁਦ ਹੀ ਖੁਦ ਨੂੰ ਪੀ ਗਈ
ਇਹ ਨਦੀ ਦਾ ਹਾਲ ਹੈ
ਇੱਕ ਕੁੜੀ, ਜੀਹਦਾ ਨਾਂ ਮੁਹੱਬਤ
ਨਾ ਗੁੰਮ ਹੈ ਨਾ ਭਾਲ ਹੈ..........।
ਜ਼ਿੰਦਗੀ ਜੂਆ ਨਹੀਂ
ਕਿ ਜਿੱਤ ਗਏ ਜਾਂ ਹਾਰ ਗਏ,
ਨਾ ਸੇਜ ਹੈ ਫੁੱਲਾਂ ਦੀ ਇਹ
ਨਾ ਜੀਅ ਦਾ ਇਹ ਜੰਜਾਲ ਹੈ
ਇੱਕ ਕੁੜੀ, ਜੀਹਦਾ ਨਾਂ ਮੁਹੱਬਤ
ਨਾ ਗੁੰਮ ਹੈ ਨਾ ਭਾਲ ਹੈ..........।
ਕਮਾਲ ਹੈ ਜਾਦੂਗਰੀ
ਸ਼ਬਦਾਂ ਨੂੰ ਭਾਵ ਦੇਣੇ,
ਭਾਵਾਂ ਤੋਂ ਪਰ ਮੂੰਹ ਫੇਰਨਾ
ਜਿਉਂਦਾ ਖੜ੍ਹਾ ਸਵਾਲ ਹੈ
ਇੱਕ ਕੁੜੀ, ਜੀਹਦਾ ਨਾਂ ਮੁਹੱਬਤ
ਨਾ ਗੁੰਮ ਹੈ ਨਾ ਭਾਲ ਹੈ..........।
ਉਸਨੂੰ ਕਹੋ ਕਿ ਏਦਾਂ ਨ੍ਹੀਂ ਹੁੰਦਾ
ਉਸਨੂੰ ਕਹੋ ਕਿ ਓਦਾਂ ਨ੍ਹੀਂ ਹੁੰਦਾ
ਉਸਨੂੰ ਕਹੋ, ਹਵਾ ਦਾ ਨ੍ਹੀਂ ਬੁੱਲ੍ਹਾ
ਉਸਨੂੰ ਕਹੋ, ਇਹ ਜੀਵਨ ਅਮੁੱਲਾ
ਉਸਨੂੰ ਕਹੋ, ਛੱਡ ਗਿਆ ਜਿਹੜੇ ਦਰ ਨੂੰ
ਉਸਨੂੰ ਕਹੋ, ਪਰਤ ਆਵੇ ਘਰ ਨੂੰ
ਉਸਨੂੰ ਪੁੱਛੋ, ਕਿ ਡਰ ਕਿਹੜੀ ਗੱਲੋਂ
ਸੁਹਾਗਣ ਨੂੰ ਵਿਧਵਾ ਦਾ ਵਰ ਕਿਹੜੀ ਗੱਲੋਂ
ਉਸਨੂੰ ਕਹੋ ਹਵਾ ਨਾ ਕਰੇ ਉਹ
ਮਰਨਾ ਤਾਂ ਹੈ ਐਵੇਂ ਨਾ ਮਰੇ ਉਹ
ਇਹ ਜੋਬਨ ਦੀ ਰੁੱਤ ਹੈ
ਇਹ ਮਾਨਣ ਦੀ ਰੁੱਤ ਹੈ
ਹਨ੍ਹੇਰਿਆਂ 'ਚੋਂ ਨਿਕਲੇ
ਇਹ ਚਾਨਣ ਦੀ ਰੁੱਤ ਹੈ
ਭੁਲੇਖਾ ਹੈ, ਫੁੱਲ ਨਾ ਉਹ ਤਾਰਾ ਹੈ ਬਣਦਾ
ਸੁਰਮੇ ਦਾ ਵੈਰੀ, ਹੰਝੂ ਖਾਰਾ ਹੈ ਬਣਦਾ
ਸ਼ਰਾਬਾਂ ਦੀ ਗੱਲ ਹੈ ਸ਼ਬਾਬਾਂ ਦੀ ਗੱਲ ਹੈ
ਆਪੋ ਅਪਣੇ ਸਵਾਦਾਂ ਦੀ ਗੱਲ ਹੈ
ਗੁਲ ਦੀ ਕਿਤੇ ਗੁਲਾਬਾਂ ਦੀ ਗੱਲ ਹੈ
ਉਸਨੂੰ ਕਹੋ ਕਿ ਇਹ ਖਾਬਾਂ ਦੀ ਗੱਲ ਹੈ
ਉਸਨੂੰ ਕਹੋ ਕਿ ਉਹ ਧਰਤੀ ਤੇ ਆਵੇ
ਅੰਬਰਾਂ ਤੇ ਹੀ ਨਾ ਉਹ ਪਰ ਆਜ਼ਮਾਵੇ
ਉਸਨੂੰ ਕਹੋ ਕੁੱਝ ਫਰਜ਼ ਵੀ ਹੁੰਦੇ
ਪੁਰਖਿਆਂ ਦੇ ਕੁੱਝ ਕਰਜ਼ ਵੀ ਹੁੰਦੇ
ਉਸਨੂੰ ਕਹੋ ਕਿ ਏਦਾਂ ਨ੍ਹੀਂ ਹੁੰਦਾ
ਉਸਨੂੰ ਕਹੋ ਕਿ ਓਦਾਂ ਨ੍ਹੀਂ ਹੁੰਦਾ
ਕੁੱਝ ਵੀ ਕਹੋ, ਉਹਨੂੰ ਫਰਕ ਨ੍ਹੀਂ ਪੈਣਾ
ਖੁਦ ਹੀ ਨਾ ਖੁਦ ਦੇ ਨਾਲ ਹੈ
ਇੱਕ ਕੁੜੀ ਜੀਹਦਾ ਨਾਂ ਮੁਹੱਬਤ
ਨਾ ਗੁੰਮ ਹੈ ਨਾ ਭਾਲ ਹੈ...........॥
No comments:
Post a Comment