ਕਿੰਨੀ ਤਕਲੀਫ਼ ਹੋਵੇ ਸੀ ਕਰ ਲੈਣਾ ਏ
ਅਸੀਂ ਥੁੜ੍ਹਾਂ ਮਾਰਿਆਂ ਨੇ ਕੀ ਕਰ ਲੈਣਾ ਏ।
ਅਸੀਂ ਕਦੇ ਜੁੱਤੀ ਨੂੰ ਵੀ ਪਾਲਿਸ਼ ਕਰਾਈ ਨਾ
ਪੈਰ ਘਸਾ ਲਏ ਪਰ ਚੱਪਲ ਘਸਾਈ ਨਾ
ਸਰਾਪੀਆਂ ਜੂਨਾਂ ਕਦੇ ਜ਼ਿੰਦਗੀ ਹੰਢਾਈ ਨਾ
ਬੱਕਰਾ ਤਿਆਰ ਪਰ ਤਿਆਰ ਕਸਾਈ ਨਾ
ਖਾਂਦਿਆਂ ਨੂੰ ਵੇਖ ਕੱਚਾ ਜੀਅ ਕਰ ਲੈਣਾ ਏ
ਹੋਰ ਥੁੜ੍ਹਾਂ ਮਾਰਿਆਂ ਨੇ ਕੀ ਕਰ ਲੈਣਾ ਏ।
ਇੱਕ ਹੱਥ ਨੋਟ ਸੀ ਤੇ ਇੱਕ ਹੱਥ ਵੋਟ ਸੀ
ਦੁੱਧੋਂ ਭੁੱਖਾ ਜੁਆਕ ਸੀ ਨਾ ਚਿੱਤ ਵਿੱਚ ਖੋਟ ਸੀ
ਮੇਮਣੇ ਨੂੰ ਇੱਕੋ ਜਿਹੀ ਦੋਹਾਂ ਦੀ ਮੰਨੌਤ ਸੀ
ਇੱਕ ਪਾਸੇ ਬਾਘ ਸੀ ਤੇ ਇੱਕ ਪਾਸੇ ਬੋਕ ਸੀ
ਮਾੜਿਆਂ ਨੇ ਕੀਹਦੇ ਨਾਲ ਟੀ ਕਰ ਲੈਣਾ ਏ
ਅਸੀਂ ਥੁੜ੍ਹਾਂ ਮਾਰਿਆਂ ਨੇ ਕੀ ਕਰ ਲੈਣਾ ਏ।
ਤੂੰ ਏਂ ਸਿਆਣਾ ਸਾਡੇ ਦਾਣੇ ਮੁੱਕੇ ਹੋਏ ਨੇ
ਬਾਤ ਮੁੱਕੀ ਹੋਈ ਏ ਕਹਾਣੇ ਮੁੱਕੇ ਹੋਏ ਨੇ
ਪਾਟੇ ਹੋਏ ਛੱਪਰ ਚੋਂ ਚੰਨ ਕਰੇ ਚੋਰੀਆਂ
ਸੂਰਜਾਂ ਉਧਾਲ਼ ਲਈਆਂ ਸਾਡੀਆਂ ਤਿਜੌਰੀਆਂ
ਬਾਦਲਾ ਤੂੰ ਵਰ੍ਹ, ਅਸੀਂ ਧੀ(ਰ) ਧਰ ਲੈਣਾ ਏ
ਹੋਰ ਥੁੜ੍ਹਾਂ ਮਾਰਿਆਂ ਨੇ ਕੀ ਕਰ ਲੈਣਾ ਏ।
ਤੂੰ ਏਂ ਵਪਾਰੀ ਤੈਨੂੰ ਨਫ਼ੇ ਨੁਕਸਾਨ ਦਾ
ਸਾਨੂੰ ਤਾਂ ਫ਼ਿਕਰ ਬੱਸ ਪਹਿਨਣ ਤੇ ਖਾਣ ਦਾ
ਗਿਣੇ ਨਹੀਂਓ ਜਾਣੇ ਤੈਥੋਂ ਸਾਡੇ ਦੁੱਖ ਸੁੱਖ ਵੇ
ਥੁੱਕ ਲਾ ਕੇ ਨੋਟ ਗਿਣਨੇ ਤੂੰ ਬੱਸ ਜਾਣਦਾ
ਤੂੰ ਵੀਹਾਂ ਨਾਲ ਦਸ ਖੱਟ ਤੀਹ ਕਰ ਲੈਣਾ ਏ
ਦੁੱਕੀ ਤਿੱਕੀ ਵਾਲਿਆਂ ਨੇ ਕੀ ਕਰ ਲੈਣਾ ਏ।
ਸਾਡਿਆਂ ਸੁਆਲਾਂ ਉੱਤੇ ਹਰ ਢਾਣੀ ਚੁੱਪ ਹੈ
ਚੌਧਰੀ ਵੀ ਚੁੱਪ ਹੈ ਤੇ ਚੌਧਰਾਣੀ ਚੁੱਪ ਹੈ
ਚੁੱਪ ਰਹਿ ਕੇ ਸਰਿਆ ਤੇ ਨਾਹੀਂ ਕਦੇ ਸਰਨਾ
ਗੁਰਬਾਣੀ ਚੁੱਪ ਹੈ ਤੇ ਗੱਗਬਾਣੀ ਚੁੱਪ ਹੈ
ਠ੍ਹੋਕਰਾਂ ਨੇ ਰਾਹੀ ਨੂੰ ਸਹੀ ਕਰ ਲੈਣਾ ਏ
ਅਸੀਂ ਥੁੜ੍ਹਾਂ ਮਾਰਿਆਂ ਨੇ ਕੀ ਕਰ ਲੈਣਾ ਏ।
