ਨੰਗ ਬਣਾ ਦੇਣਗੇ ਬੀਬਾ ਮੰਗਣ ਲਾ ਦੇਣਗੇ ਬੀਬਾ
ਸੂਟੇ ਲਾ ਦੇਣਗੇ ਬੀਬਾ ਆਦਤ ਪਾ ਦੇਣਗੇ ਬੀਬਾ
ਨਾ ਜਾਈ ਮਸਤਾਂ ਦੇ ਡੇਰੇ ਖਸਤ ਬਣਾ ਦੇਣਗੇ ਬੀਬਾ
ਨਾ ਜਾਈਂ ਮਸਤਾਂ ਦੇ ਡੇਰੇ ਖਸਤ ਬਣਾ ਦੇਣਗੇ ਬੀਬਾ।
ਜਦ ਫ਼ੀਮ ਮਿਲੇ ਨਾ ਭੁੱਕੀ ਨੀਂ ਥਾਣਿਓਂ ਵੀ ਹੋਵੇ ਮੁੱਕੀ ਨੀਂ
ਤੂੰ ਲਾਹ ਪੈਰਾਂ ‘ਚੋਂ ਜੁੱਤੀ ਨੀਂ ਆ ਜਾਵੀਂ ਬੂਥਾ ਚੁੱਕੀ ਨੀਂ
ਸਿੱਧੀਆਂ ਪਾ ਦੇਣਗੇ ਬੀਬਾ, ਪਾਰ ਬੁਲਾ ਦੇਣਗੇ ਬੀਬਾ
ਆ ਜਾਈ ਮਸਤਾਂ ਦੇ ਡੇਰੇ ਖਸਤ ਬਣਾ ਦੇਣਗੇ ਬੀਬਾ
ਆ ਜਾਈ ਮਸਤਾਂ ਦੇ ਡੇਰੇ ਖਸਤ ਬਣਾ ਦੇਣਗੇ ਬੀਬਾ।
ਨਾ ਚਿੜੀਆਂ ਦਾ ਨਾ ਬਾਜ਼ਾਂ ਦਾ ਇਹ ਦੇਸ਼ ਹੈ ਘਪਲੇਬਾਜ਼ਾਂ ਦਾ
ਹਰ ਪਾਸੇ ਮਾਰਾ ਮਾਰੀ ਐ ਹੱਦ ਟੱਪ ਗਈ ਬੇਰੁਜ਼ਗਾਰੀ ਐ
ਬਜਰੀ ਨਾ ਗਟਕਾ ਰੇਤਾ ਏ ਹਰ ਮੋੜ ਤੇ ਖੁੱਲ੍ਹਿਆ ਠੇਕਾ ਏ
ਮਹਿੰਗਾਈ ਸੁੱਕਣੇ ਪਾਇਆ ਏ ਆਲੂ ਗੰਢਿਆਂ ਦਾ ਤਾਇਆ ਏ
ਵਿੱਚ ਅਦਾਲਤਾਂ ਦੇ ਇਨਸਾਫ਼ ਨਹੀਂ ਮਾੜੇ ਨੂੰ ਕੁੱਝ ਵੀ ਮੁਆਫ਼ ਨਹੀਂ
ਲਾ ਸੁਲਫੇ ਦਾ ਲੰਮਾ ਸੂਟਾ ਕਸ਼ਟ ਭੁਲਾ ਦੇਣਗੇ ਬੀਬਾ ਤੇ ਸੁਰਗ ਵਿਖਾ ਦੇਣਗੇ ਬੀਬਾ
ਆ ਜਾਈਂ ਮਸਤਾਂ ਦੇ ਡੇਰੇ ਮਸਤ ਬਣਾ ਦੇਣਗੇ ਬੀਬਾ।
ਸੱਤਨਾਮ-ਸੱਤਨਾਮ, ਵਾਹਿਗੁਰੂ-ਵਾਹਿਗੁਰੂ
ਵਾਹਿਗੁਰੂ-ਵਾਹਿਗੁਰੂ, ਸਤਿਨਾਮ-ਸਤਿਨਾਮ
ਨਾਮ ਜਪਾ ਦੇਣਗੇ ਬੀਬਾ ਤੇ ਫਰਜ਼ ਭੁਲਾ ਦੇਣਗੇ ਬੀਬਾ
ਮਾਲਾ ਫੜਾ ਦੇਣਗੇ ਬੀਬਾ ਤੇ ਵਿਹਲੇ ਬਿਠਾ ਦੇਣਗੇ ਬੀਬਾ
ਆ ਜਾਈਂ ਮਸਤਾਂ ਦੇ ਡੇਰੇ ਮਸਤ ਬਣਾ ਦੇਣਗੇ ਬੀਬਾ।
ਹੈ ਮਸਤੀ ਦੁਨੀਆਂ ਸਾਰੀ ਨੀਂ ਨਾ ਕਿਸੇ ਨੂੰ ਕੋਈ ਬੀਮਾਰੀ ਨੀਂ
ਲੁੱਟੇ ਵੀ ਲੋਕੀਂ ਜਾਂਦੇ ਨੇ ਕੁੱਟੇ ਵੀ ਲੋਕੀਂ ਜਾਂਦੇ ਨੇ ਖੁਦਕੁਸ਼ੀਆਂ
ਪਿਆ ਕੋਈ ਕਰਦਾ ਏ ਕੋਈ ਅਪਣੀ ਮੌਤ ਨਾ ਮਰਦਾ ਏ
ਗਾਉਣ ਵਾਲੇ ਵੀ ਘੱਟ ਹੈ ਨਹੀਂ ਜੋ ਦੱਸਦੇ, ਦਿਸਦਾ ਜੱਟ ਹੈ ਨਹੀਂ
ਕੁੜੀਆਂ ਨੂੰ ਪੁਰਜ਼ਾ ਬਣਾਉਂਦੇ ਨੇ ਸਕੀਆਂ ਤੋਂ ਅੱਖ ਚੁਰਾਉਂਦੇ ਨੇ
ਲੋਕਾਂ ਦਾ ਆਵਾ ਊਤ ਗਿਆ ਕੋਈ ਅਣਖ ਇਨ੍ਹਾਂ ਦੀ ਸੂਤ ਗਿਆ
ਨਾ ਸੱਚ ਰਿਹਾ ਨਾ ਝੂਠ ਗਿਆ ਥਾਲ਼ੀ ਵਿੱਚ ਕੁੱਤਾ ਮੂਤ ਗਿਆ
ਹੈ ਸਾੜ੍ਹਸਤੀ ਸਿਰ ਚੜ੍ਹੀ ਹੋਈ ਬਾਦਲ ਦੀ ਮੁੱਛ ਪਰ ਖੜ੍ਹੀ ਹੋਈ ਨੰਨ੍ਹੀ ਛਾਂ ਢੋਂਗ ਰਚਾ ਬੀਬਾ ਤੇ ਜੈ ਮਸਤਾਂ ਦੀ ਗਾ ਬੀਬਾ ਗਾਇਆ ਕਰ ਤੂੰ ਜੈ ਮਸਤਾਂ ਦੀ ਐਨ ਘਸਾ ਦੇਣਗੇ ਬੀਬਾ, ਗੁਣੀ ਬਣਾ ਦੇਣ ਗੇ ਬੀਬਾ
ਆ ਜਾਈਂ ਮਸਤਾਂ ਦੇ ਡੇਰੇ ਮਸਤ ਬਣਾ ਦੇਣਗੇ ਬੀਬਾ।
ਸੁਣ ਕੀ ਕਹਿੰਦੀ ‘ਗੱਗ-ਬਾਣੀ’ ਨੀਂ ਘਰ-ਘਰ ਦੀ ਇਹੋ ਕਹਾਣੀ ਨੀਂ
ਨਾ ਚੁੱਲ੍ਹਿਆਂ ਦੇ ਵਿੱਚ ਅੱਗ ਰਹੀ ਤੇ ਨਾ ਘੜਿਆਂ ਵਿੱਚ ਪਾਣੀ ਨੀਂ
ਗੁਲਾਮ ਹਾਂ ਅਸੀਂ ਆਜ਼ਾਦ ਨਹੀਂ ਇਹ ਤਾਂ ਸਾਡਾ ਪੰਜਾਬ ਨਹੀਂ
ਪੈਣੀ ਮੁੱਢ ਤੋਂ ਪੈਂਤੀ ਪੜ੍ਹਨੀ ਐ ਇੱਕ ਹੋਰ ਲੜਾਈ ਲੜਨੀ ਐ
ਹੁਣ ਭਗਤ ਸਰਾਭੇ ਨਹੀਂ ਆਉਣਾ ਨਾ ਨਾਨਕ ਬਾਬੇ ਹੀ ਆਉਣਾ
ਸੁਣ ਓ ਬੀਬਾ ਨੇਤਰ ਤੀਜਾ
ਸੱਚ ਵਿਖਾ ਦਿਆਂਗੇ ਬੀਬਾ, ਭਰਮ ਮਿਟਾ ਦਿਆਂਗੇ ਬੀਬਾ
ਤੂੰ ਪੜ੍ਹਿਆ ਕਰ ‘ਗੱਗ-ਬਾਣੀ’ ਬੈਂਡ ਬਜਾ ਦਿਆਂਗੇ ਬੀਬਾ।
No comments:
Post a Comment