ਕਾਮਰੇਡ:-ਅਸਾਂ ਫਲਸਫਾ ਫੋਲ ਮਾਰਿਆ
ਤੇ ਤੁਸਾਂ ਕਦਰ ਨਾ ਪਾਈ ਏ
ਆਪ:- ਖੜ੍ਹੇ ਪਾਣੀਆਂ 'ਚ ਮੁਸ਼ਕ
ਤੁਸਾਂ ਕਿਉਂ ਭੁਲਾਈ ਏ।
ਕਾਮਰੇਡ:-ਸਾਨੂੰ ਪਤੈ ਕੀ ਹੋਣੈ
ਤੇ ਕੀ ਹੋ ਰਿਹਾ ਏ।
ਆਪ:- ਕੋਣ ਹੈ ਜੋ ਹਾਲਾਤ ਤੋਂ
ਮੂੰਹ ਲੁਕੋ ਰਿਹਾ ਏ।
ਕਾਮਰੇਡ:- ਆਏਗਾ ਇਨਕਲਾਬ
ਸਰਮਾਏਦਾਰੀ ਮੁੱਕਣ ਤੇ
ਆਪ:- ਅਫਸੋਸ ਸਮਝਦਾਰਾਂ ਦੀ
ਸਮਝਦਾਰੀ ਮੁੱਕਣ ਤੇ।
ਕਾਮਰੇਡ:- ਇਤਿਹਾਸ ਅਪਣੇ ਆਪ ਵਿੱਚ
ਦੁਹਰਾਇਆ ਜਾਂਦਾ ਹੈ।
ਆਪ:- ਇਤਿਹਾਸ ਬਣਦਾ ਨਹੀਂ
ਬਣਾਇਆ ਜਾਂਦਾ ਹੈ।
ਕਾਮਰੇਡ:- ਤੁਸੀਂ ਆਏ ਹੋ ਦੱਲੇ
ਸਰਮਾਏਦਾਰੀ ਦੇ ਘੱਲੇ
ਆਪ:- ਸਾਡੇ ਤੇ ਊਜ ਨਾ ਲਾਓ
ਤੁਸੀਂ ਕਾਰਤੂਸ ਚੱਲੇ।
ਕਾਮਰੇਡ:- ਵੇਖਦੇ ਆਂ ਕਿੰਨਾ ਚਿਰ
ਇਹ ਸਰਕਾਰ ਚੱਲਦੀ ਏ
ਆਪ:- ਲੋਕ ਚਲਾਉਣਗੇ
ਇਹ ਲੋਕਾਂ ਨਾਲ਼ ਚੱਲਦੀ ਏ।
ਕਾਮਰੇਡ:- ਕਿਉਂ ਪੱਕੇ ਨਹੀਂ ਕੀਤੇ
ਮੈਟਰੋ ਮਜ਼ਦੂਰ ਅਜੇ
ਆਪ:- ਤੁਸੀਂ ਕਾਹਤੋਂ ਭੁੱਲਦੇ ਓ
ਸਾਡੇ ਹੱਥ ਮਜ਼ਬੂਰ ਅਜੇ।
ਕਾਮਰੇਡ:- ਕਾਹਦੀ ਮਜ਼ਬੂਰੀ ਐ
ਸਰਕਾਰੇ ਅਰਵਿੰਦੇ
ਆਪ:- ਸਮਾਂ ਤਾਂ ਲੱਗਦਾ ਹੈ
ਤੁਸੀਂ ਸਮਾਂ ਹੀ ਨਹੀਂ ਦਿੰਦੇ।
ਕਾਮਰੇਡ:- ਤੁਸਾਂ ਵਾਅਦਾ ਕੀਤਾ ਸੀ
ਓਸੇ ਤੋਂ ਫਿਰ ਗਏ ਨੇ
ਆਪ :- ਦੱਸ ਕਿੱਧਰ ਨੂੰ ਹੋਈਏ
ਚੁ-ਪਾਸਿਓਂ ਘਿਰ ਗਏ ਨੇ।
ਕਾਮਰੇਡ:- ਸਰਕਾਰ ਚਲਾਉਣਾ ਵੀ
ਤੇਰੇ ਵੱਸ ਦੀ ਗੱਲ ਨਹੀਂ
ਆਪ:- ਸਿੱਧਾ ਕਿਉਂ ਨਹੀਂ ਕਹਿ ਦਿੰਦੇ
ਨਾਲ ਸਕਦੇ ਚੱਲ ਨਹੀਂ।
ਆਮ ਲੋਕ:- ਇਹ ਬਹਿਸ ਨਹੀਂ ਮੁੱਕਣੀ
ਗੱਲ ਸੋਲ਼ਾਂ ਆਨੇ ਆ।
ਨਾ ਮਿਲ ਕੇ ਚੱਲਣ ਦੇ
ਤਾਂ 100 ਬਹਾਨੇ ਆ।
ਜੇ ਮਿਲ ਕੇ ਚੱਲੋਗੇ
ਕੁੱਝ ਕਰ ਵੀ ਸਕਦੇ ਓ
ਸਮਿਆਂ ਦੇ ਜ਼ਖਮਾਂ ਨੂੰ
ਤੁਸੀਂ ਭਰ ਵੀ ਸਕਦੇ ਓ।
No comments:
Post a Comment