~ ਜ਼ਿੰਦਗ਼ੀ ਬਹੁਤ ਕੀਮਤੀ ਹੈ ~

ਜ਼ਿੰਦਗ਼ੀ ਬਹੁਤ ਕੀਮਤੀ ਹੈ
ਅਸੀਂ ਜਾਣਦੇ ਹਾਂ

ਜ਼ਿੰਦਗ਼ੀ ਦੀ ਅਹਿਮੀਅਤ
ਜ਼ਿੰਦਗ਼ੀ ਦਾ ਮਕਸਦ
ਤੇ ਜ਼ਿੰਦਗ਼ੀ ਦਾ ਲੁਤਫ਼ ਉਠਾਉਣਾ
ਚੰਗੀ ਤਰਾਂ ਆਉਂਦਾ ਹੈ
ਸਾਨੂੰ।

ਅਵਾਰਾ ਕੁੱਤੇ ਦੇ ਰੋੜਾ ਮਾਰ ਕੇ
ਠਹਾਕੇ ਲਗਾਉਣਾ

ਕਾਟੋ ਦਾ ਨਿਸ਼ਾਨਾ ਬੰਨ੍ਹ ਕੇ
ਪਿੱਠ ਥਪ-ਥਪਾਉਣੀ

ਚਾਰ ਟਾਇਰੀ ਦੀਆਂ
ਚਾਰੇ ਤਾਕੀਆਂ ਖੋਲ੍ਹ ਕੇ
ਰਾਤ ਰਾਣੀ ਦੀ ਮਹਿਕ ਵਿੱਚ ਭਰ ਦੇਣੀ
ਬੀਅਰ ਦੀ ਹਵ੍ਹਾੜ

ਬੁੱਲਟ ਦੀ ਦੁੱਗ-ਦੁੱਗ
ਬਦਲ ਦੇਣੀ
ਦੀਵਾਲੀ ਦੇ ਬੁੱਲਟ ਬੰਬ ਨਾਲ

ਮੋੜਾਂ ਤੇ ਖੜ੍ਹ ਕੇ
ਅੱਖਾਂ ਨਾਲ ਮਿਣਨਾ
ਮੁਟਿਆਰਾਂ ਦੀਆਂ ਛਾਤੀਆਂ ਦੇ ਉਭਾਰ

ਹਰ ਸੰਗਰਾਂਦ, ਮੱਸਿਆ ਤੇ
ਬਖਸ਼ਾ ਲੈਣੀਆਂ
ਭੁੱਲਾਂ
ਤੇ ਮੰਗ ਲੈਣੀਆਂ ਖੁੱਲਾਂ

ਗਲ਼ੀਆਂ, ਨਾਲ਼ੀਆਂ ਦੀਆਂ ਗਰਾਂਟਾਂ ਬਦਲੇ
ਦਫ਼ਨ ਕਰ ਦੇਣੀਆਂ
ਲੋਹੇ ਦੀ ਪੇਟੀ ਵਿੱਚ
ਅਪਣੇ ਬੱਚਿਆਂ ਦੀਆਂ ਡਿਗਰੀਆਂ

ਜੇ ਆਹ ਹੀ ਕੁਛ ਕਰਨਾ ਹੁੰਦਾ
ਤਾਂ ਅਸੀਂ ਵੀ
ਚੱਕੀ ਦੇ ਪੁੜਾਂ ਵਿੱਚ ਫਸਿਆਂ ਨੇ

ਤੁਹਾਨੂੰ
ਅੰਬਰ ਦੀ ਗਹਿਰਾਈ ਨਾਪਣ ਵਾਲਿਆਂ ਨੂੰ
ਮੱਤਾਂ ਦਿਆ ਕਰਨੀਆਂ ਸੀ

ਕਿ ਜ਼ਿੰਦਗ਼ੀ ਬਹੁਤ ਕੀਮਤੀ ਹੈ
ਸੰਭਲ ਕੇ ਚੱਲਿਆ ਕਰੋ।
‪- ‎ਗੱਗਬਾਣੀ‬