ਪਰਮ ਧਰਮ

ਦਾਰੂ ਪੀ ਕੇ ਵੀ
ਸ਼ਹਿਨਸ਼ਾਹ ਹੋਣਾ
ਸਾਨੂੰ ਨਹੀਂ ਆਇਆ

ਨਹੀਂ ਚੁੱਕੇ ਜਾਂਦੇ 
ਸਾਡੇ ਪੈਰ

ਨਹੀਂ ਉਡਾਏ ਜਾਂਦੇ
ਸਾਡੇ ਕੋਲੋਂ
ਗਾਂਧੀ ਵਾਲੇ ਨੋਟ

ਨਹੀਂ ਕੀਤੀ ਜਾਂਦੀ
ਅਪਣੇ ਆਪ ਦੀ
ਵਕਾਲਤ

ਸਾਨੂੰ ਪਤਾ ਨਹੀਂ
ਸ਼ਰਾਬ ਕਿਉਂ ਨਹੀਂ ਚੜ੍ਹਦੀ

ਅਸੀਂ ਅਜੇ ਵੀ
ਦੁੱਧ ਪੀ ਕੇ
ਸ਼ੀਸ਼ੇ ਮੂਹਰੇ ਖਲੋ ਕੇ

ਡੋਲੇ ਫੁਲਾ ਕੇ
ਅਪਣੀ ਤਾਕਤ ਪਰਖਣ ਦਾ
ਭਰਮ ਪਾਲੀ ਬੈਠੇ ਹਾਂ

ਸ਼ਰਾਬ ਪੀਣ ਤੋਂ ਬਾਅਦ
ਜਿਹਨਾਂ ਦੀਆਂ ਅੱਖਾਂ ਵਿੱਚ
ਲਾਲੀ ਉੱਤਰਦੀ ਹੈ

ਉਹ ਪਤਾ ਨਹੀਂ
ਕਿਸ ਮਿੱਟੀ ਦੇ ਬਣੇ ਹੋਣਗੇ

ਸਾਡੀਆਂ ਅੱਖਾਂ ਵਿੱਚ
ਅਜੇ ਵੀ
ਭੈਅ ਉੱਤਰਦਾ ਹੈ

ਕਿ ਸਾਡੇ ਵਾਰੀ
ਹਰ ਨਸ਼ਾ
ਕਿਉਂ ਭੁੱਲ ਜਾਂਦਾ ਹੈ
ਅਪਣਾ
ਪਰਮ ਧਰਮ ।
‪- ਗੱਗਬਾਣੀ‬