ਪਾਈਆ ਦੁੱਧ ਨਾਲ
ਗੜਵੀ ਕਦੇ ਵੀ ਨਹੀਂ ਭਰਦੀ।
ਪਤਾ ਦੀਪੇ ਨੂੰ ਵੀ ਹੈ
ਪਰ ਡਾਕਟਰ ਨੇ ਕਿਹਾ ਹੈ
ਸਵੇਰੇ ਸ਼ਾਮ
ਦੁੱਧ ਪੀਣ ਨੂੰ
ਤਾਂ ਜੁ ਉਸ ਦੀਆਂ
ਹੱਡੀਆਂ ਵਿੱਚ ਜਾਨ ਆ ਜਾਵੇ
ਤੇ ਉਹ ਮੁੜ ਸਿੱਧੂਆਂ ਦੇ ਟਰੈਕਟਰ ਮੂਹਰੇ
ਬਲ਼ਦ ਬਣ
ਜੋਤਾ ਲਾਉਣ ਜੋਗਾ ਹੋ ਜਾਵੇ।
ਪਾਈਆ ਦੁੱਧ ਨਾਲ
ਗੜਵੀ ਕਦੇ ਵੀ ਨਹੀਂ ਭਰਦੀ
ਪਤਾ ਰਾਮ ਰਤਨੀ ਨੂੰ ਵੀ ਹੈ।
ਪਰ ਘਰ ਦਾ ਇੱਕੋ ਇੱਕ
ਕਮਾਊ ਬੰਦਾ
ਮੰਜੇ ਤੇ ਪੈ ਜਾਵੇ
ਤਾਂ ਚੁੱਲ੍ਹੇ ਦੀ ਅੱਗ
ਲੂਣ, ਤੇਲ, ਸਾਬਣ
ਮੱਲੋ-ਮੱਲੀ ਲੈ ਜਾਂਦਾ ਹੈ ਉਸਨੂੰ
ਸਿੱਧੂਆਂ ਦੇ ਵਾੜੇ ਵਿੱਚ
ਤੇ ਕੁੰਡੀਆਂ ਮੁੱਛਾਂ ਵਾਲਾ ਸਰਦਾਰ
ਮੁੱਛਾਂ ਨੂੰ ਹੋਰ ਕੁੰਡੀਆਂ ਕਰਦਾ ਹੋਇਆ
ਖਚਰੀ ਹਾਸੀ ਹੱਸਦਾ ਹੈ
ਚਾਦਰੇ ਨੂੰ ਲੱਗੀ ਮਿੱਟੀ ਝਾੜਦਾ ਹੈ
ਤੇ ਭਈਏ ਨੂੰ ਰੋਅਬਦਾਰ ਆਵਾਜ਼ ਨਾਲ
ਹੁਕਮ ਚਾੜ੍ਹਦਾ ਹੈ
ਉੱਪਰ ਵਾਲੇ ਦੀ ਕਿਰਪਾ ਨਾਲ
ਹੇਠ੍ਹਾਂ ਵਾਲਿਆਂ ਦੇ ਲੂਣ, ਤੇਲ ਦਾ
ਜੁਗਾੜ ਹੋ ਜਾਂਦਾ ਹੈ
ਪਾਈਆ ਦੁੱਧ ਨਾਲ
ਗੜਵੀ ਕਦੇ ਵੀ ਨਹੀਂ ਭਰਦੀ।
ਦੁੱਧ ਦੇ ਗਲਾਸ ਬਦਲੇ
ਅਸਮਤ ਦਾ ਸੌਦਾ ਕਰ ਲੈਣ ਵਾਲੇ
ਕਮੀਣ ਤਾਂ ਹੋਣਗੇ
ਜ਼ਰੂਰ ਹੋਣਗੇ
ਪਰ ਕਮੀਨੇ ?
ਕਮੀਨੇ ਤਾਂ ਉਹ ਹਨ
ਜੋ ਦਾਰੂ ਦੇ ਗਲਾਸ ਬਦਲੇ
ਖਰੀਦ ਲੈਂਦੇ ਹਨ
ਵਾਧੂ ਮਿਹਨਤ
ਵੋਟਾਂ ਦੀ ਗਿਣਤੀ
ਮਾਸੂਮਾਂ ਦਾ ਭਵਿੱਖ
ਤੇ ਖੈਰਾਤ ਵਿੱਚ ਵੰਡ ਦਿੰਦੇ ਹਨ
ਅਣਚਾਹੇ ਗਰਭ
ਆਂਦਰਾਂ ਨੂੰ ਸੋਕਾ
ਮੰਜਿਆਂ ਨੂੰ ਮਰੀਜ਼ ।
ਪਾਈਆ ਦੁੱਧ ਨਾਲ
ਗੜਵੀ ਕਦੇ ਵੀ ਨਹੀਂ ਭਰਦੀ।
ਪਤਾ ਨਹੀਂ
ਮਿੱਤਲਾਂ/ਅੰਬਾਨੀਆਂ ਨੇ
ਕਿਹੜੇ ਸਿੱਧੂਆਂ ਨਾਲ
ਮਾਰਿਆ ਹੋਣਾ ਏ
ਅਸਮਤਾਂ ਦਾ ਸੌਦਾ
ਜੋ ਨੱਕੋ-ਨੱਕ ਗੜਵੀਆਂ ਭਰੀ ਫਿਰਦੇ ਨੇ?
ਪਾਈਆ ਦੁੱਧ ਨਾਲ
ਗੜਵੀ ਕਦੇ ਵੀ ਨਹੀਂ ਭਰਦੀ।
No comments:
Post a Comment